Natanz sızıntısı: İrandan Azərbaycana gələn qidalar təhlükədədirmi? – Ağa Salamov
İran və İsrail arasında münaqişə daha da kəskinləşərsə və radiasiya yayılarsa, bu, Azərbaycana idxal olunan ərzaq məhsullarına necə təsir göstərə bilər? Qeyd edək ki, düyü, ərik və digər kənd təsərrüfatı məhsullarının bir hissəsi İrandan gətirilir. Radiasiyanın su və torpağa təsiri bu məhsulların təhlükəsizliyini sual altına qoya bilər.
Məsələ ilə bağlı Tribunainfo.az-a açıqlama verən qida üzrə ekspert Ağa Salamov bildirib ki, İsrailin İrana endirdiyi zərbələr nəticəsində Natanz nüvə obyektində müəyyən sızmalar baş verib. Lakin bu sızmaların yalnız obyektin daxilində olduğu bildirilib.
A. Salamovun sözlərinə görə, beynəlxalq səviyyədə həyəcan siqnalı verilməyib. “Əgər sızma daxildədirsə və izolyasiya işləri aparılırsa, bu, qida məhsullarının hələlik təhlükədə olmadığını göstərir,” – deyə Ağa Salamov qeyd edib.
Ekspert vurğulayıb ki, Beynəlxalq Atom Enerjisi Agentliyi də bildirib ki, radiasiyanın qarşısının alınması üçün obyekt daxilindəki vəziyyət nəzarət altındadır. Bu səbəbdən, hazırda qida təhlükəsizliyinə dair narahatlıqlar rəsmi olaraq təsdiqlənməyib.
Ekspert əlavə edib ki, əgər gələcəkdə radiasiya sızıntısı təsdiqlənərsə və ətraf mühitə mənfi təsiri müşahidə olunarsa, bu zaman təkcə qida məhsulları deyil, insan sağlamlığı da təhlükə altına düşə bilər. Belə bir hal baş verərsə, İran hökuməti həmin bölgədə yetişdirilən məhsulları məhv etməli və ixracatın qarşısını almalıdır.
Ağa Salamov sonda bildirib ki, hazırda vəziyyət nəzarət altındadır və Azərbaycana idxal olunan ərzaq məhsullarında hər hansı təhlükə yoxdur. Lakin müharibənin daha da alovlanması və radiasiyanın ətraf ərazilərə yayılması halında bu təhlükə reallığa çevrilə bilər.
Hətta sabah müharibə qızışarsa, sızma ətrafa yayılarsa, burada təkcə qida deyil, qonşu sərhədlərə də təəssüflər olsun ki, mənfi təsirini göstərəcək. Belə olan halda İranın qonşu sərhədlərində yetişən qidalara da mənfi təsir olacaq.
Dəniz Pənahova
